狗狗同人一樣，會有乳齒同恆齒之分。啱啱出世嘅時候係冇牙齒㗎，大概20日左右，就會開始出乳齒，總共有28隻。 4-6個月喺換牙期，換齊牙之後會有42隻恆齒。（好彩嘅話有可能會執到，但大多數都會呑咗落肚）
如果狗狗8個月大都仲有乳齒未甩，咁就會成為永久性乳齒，需要搵醫生幫手剝牙仔！

唔剝乳齒得唔得㗎？

如果乳齒冇甩，新生出嚟嘅恆齒會同乳齒互相擠壓，令牙齒唔齊整，咬合不正。除咗影響到外觀仲用功能性！
由於咬合不正，毛小孩們可能只會用正常嘅一邊咀嚼，對牙齒嘅損耗比較大，容易發炎。
牙齒重疊，容易積聚食物殘渣，構成牙石，引起口腔問題。 如果口腔問題嚴重嘅話細菌有可能隨住血管走入身體，會影響埋身體健康！

所以係換牙期主人們要多加留意恆齒嘅生長狀況，有疑問就記得去問問家庭醫生喇！